२०७८ अशोज २, शनिबार
  • प्रभावकारी न्यूज सम्बाददाता २ महिना अगाडि

दमक । झापा जिल्लामा कोभिड १९ को महामारी तिब्र गतिमा फैलिरहेको छ । सबैभन्दा आक्रान्तमध्येको हो दमक नगरपालिका तथा आसपासको क्षेत्र ।

यो पीडित क्षेत्रलाई चीन नेपाल मैत्री औद्योगिक पार्कले ठूलो परिमाणमा स्वास्थ्य सामग्री सहयोग दिएको छ । सो सामग्री रसुवा नाका हुँदै नेपाल ल्याइएको थियो । ती सामग्री औद्योगिक पार्कका अध्यक्ष गोविन्द थापाले आज एक समारोह बीच दमक नगरपालिकालाई हस्तान्तरण गर्नुभएको हो ।

औद्योगिक पार्कले दिएको सहयोगमा १५ थान अक्सिजन कन्सन्ट्रेटर मेसिन समेत छ । यी मेसिनले पाँच लिटर क्षमतामा उच्च गुणस्तरको अक्सिजन निरन्तर प्रवाह गर्ने बताइएको छ । विद्युतबाट चल्ने यी मेसिनले चौबिसै घन्टा काम गर्न सक्छ । यी मेसिन दमक अस्पतालमा प्रयोग गरिने छ । त्यसबाहेक उच्च गुणस्तरीय मास्क लगायत अस्पतालमा प्रयोग हुने विभिन्न सामग्री सहयोग स्वरुप दिइएको छ । ती मास्क पनि स्वास्थ्यकर्मीको प्रयोगका लागि मात्र भएको बताइएको छ ।

सहयोग सामग्री ग्रहण गर्दै दमक नगरपालिकाका मेयर रोमनाथ ओलीले अहिले दमक समस्यामा रहेको बताउनुभयो । महामारी बढ्नाले दमकमा पुन निषेधाज्ञा जारी गर्नुपरेको, अस्पतालहरु फेरि पनि भरिभराउ हुन लागेको बेला सहयोग दिएकोमा औद्योगिक पार्क, चिनियाँ सरकार तथा चिनियाँ जनतालाई धन्यवाद ज्ञापन गर्नुभयो ।

उपमेयर गीता अधिकारीले निर्माणाधीन औद्योगिक पार्क दमक तथा पूरै झापा जिल्लाका जनताको सपनाको केन्द्र भएको बताउँदै यसले विपत्का बेला गरेको स्वास्थ्य सामग्री सहयोग मूल्यवान रहेको बताउनुभयो ।

नेपालमा क्रमश महामारीले विकराल रुप धारण गरिरहेको बेला औद्योगिक पार्कले स्वास्थ्य सामग्री सहयोग गरेको हो । खासगरी एक नम्बर प्रदेशको झापा जिल्लामा महामारी तिब्र गतिमा फैलिरहेको छ ।

सहयोग हस्तान्तरण गर्दै पार्कका अध्यक्ष गोविन्द थापाले भन्नुभयो– ‘कोभिड महामारीका कारण विश्वले ठूलो क्षति भोगिरहेको छ । यतिबेला औद्योगिक पार्कमा चीन सरकारले बनाउने ठूलाठूला उद्योगहरु हामीले उपहारका रुपमा पाउने थियौं, तर, महामारीका कारण स्वास्थ्य सामग्री सहयोग लिनुपर्ने भयो ।’

महामारी बीचमै पनि औद्योगिक पार्कको सबै प्रक्रिया अगाडि बढाइने थापाले बताउनुभयो ।

रोजगारीमा कोभिड पीडितलाई प्राथमिकता

दमकमा निर्माणाधीन चीन नेपाल मैत्री औद्योगिक पार्कमा आगामी दिनमा कोभिड पीडितलाई प्राथमिकता दिइने भएको छ । दमक औद्योगिक पार्कले ठूलो संख्यालाई रोजगार दिन गइरहेको छ । सो पार्कमा कोभिडबाट मृत्यु भएकाहरुको परिवारलाई रोजगारीमा प्राथमिकता दिइन लागेको हो ।

चीन नेपाल मैत्री औद्योगिक पार्क झापाका तीन पालिकाहरु दमक, कमल र गौरादहमा फैलिएको छ । दक्षिण एसियाकै अध्याधुनिक हुने सो पार्क गत माघमा तत्कालीन प्रधानमन्त्री केपी शर्मा ओलीले शिलान्यास गर्नुभएको थियो ।

पार्कका अध्यक्ष गोविन्द थापाले सहयोग सामग्री हस्तान्तरण गर्दै भन्नुभयो– ‘यहाँ बन्न गइरहेको औद्योगिक पार्क निर्जिव वस्तु होइन, यो पार्क यहाँका जनताको साथी हो । त्यसैले विपद्का बेला औद्योगिक पार्कले सबैलाई सहयोग गर्छ । कोभिड १९ बाट मारिएकाहरुको परिवारलाई औद्योगिक पार्कले रोजगारीमा प्राथमिकता दिनेछ ।’

समारोहमा चीनको ल्हासा इकोनोमिक एण्ड टेक्निकल जोनका प्रमुख चोउ चेङग जीले पठाउनुभएको सन्देश सुनाइएको थियो । सन्देशमा चोउले महामारीको चपेटामा परेको दमक तथा आसपासका जनतालाई मनोबल उच्च राख्न आग्रह गर्नुभएको छ । कोभिड १९ माथि चाँडै विजय पाइने विश्वास गर्दै चोउले महामारीकै बीचमा औद्योगिक पार्क निर्माण प्रक्रिया अगाडि बढाइने सन्देश पठाउनुभएको छ ।