२०८१ बैशाख ८, शनिबार
  • प्रभावकारी न्यूज सम्बाददाता ५ वर्ष अगाडि

काठमाण्डौ । डा. गोविन्द केसीले चिकित्सा शिक्षा आयोगमा हाल भइरहेको उपाध्यक्ष नियुक्ति प्रक्रिया तत्काल रोक्न माग गरेका छन् । बिहिबार विज्ञप्ति जारी गर्दै उनले सरकारले नियुक्ति प्रक्रियाको कर्मकाण्ड देखाएर पन्छिने नभई योग्य मान्छे खोजेर स्वतन्त्रतापूर्वक काम गर्ने वातावरण बनाउनुपर्ने भन्दै प्रक्रिया रद्द गर्न माग गरेका हुन् ।
उनले विज्ञप्तिमा भनेका छन,‘चिकित्सा शिक्षा ऐनका माफियामुखी प्रावधानहरु हटाउने गरी ऐन संशोधन गर्न तथा चिकित्सा शिक्षा आयोगको उपाध्यक्षमा योग्यतम तथा कार्यक्षमता प्रमाणित भइसकेको व्यक्ति नियुक्त गर्न जोडदार माग गर्दछौं’। यदि त्यसो नगरिएमा कडा आन्दोलनका कार्यक्रम ल्याउन बाध्य हुने उनले बताए ।
आयोगको उपाध्यक्ष कसैलाई जागिर खुवाउने वा कसैको स्वार्थपूर्तिभन्दा बढी संवेदनशील कुरा भएको बताउदै उनले भनेका छन् ‘आयोगको संस्थापक उपाध्यक्ष अयोग्य मानिस वा पार्टीको कार्यकर्ता बन्नु भनेको यस क्षेत्रमा अहिलेसम्म देखा परेका यावत विकृतिहरुलाई झनै मौलाउन दिनु र चिकित्सा शिक्षा क्षेत्रको नियमन अस्तव्यस्त पार्नु हो ।’

केसीले आफूले चिकित्सा शिक्षा ऐनको अपनत्व ग्रहण नगरेको तर त्यसमा सुधारका लागि लडिरहेको हुनाले उपाध्यक्ष छनोटका विषयमा मौन रहन नसक्ने बताएका छन ।

शेयर बजारः ओरालो यात्रा कायम